صلاح
سلام عد النخل لاصاف = واحلى من السكر الحالي
لاهل المواجيب والميقاف = اللي لهم ينشرح بالي
الشاكر ابو سامي
ترحيب ما يوصفه وصاف = تعجز منه كل الاقوالي
راعي وفا فاللزوم تشاف = دايم على قلوبنا غالي
صلاح
عسي البقا من قلوب نظاف = دوبه صفا جو الارسالي
نستاذن الساده العراف = الليل لازال له تالي
ابو سامي
مدري عن الطرف واللي شاف = وارسالنا كان متوالي
وان كان ودك تبا محراف = قوده صعيبات وثقالي
صلاح
سنين ذقت العذاب اصناف = وهمومي الوان واشكالي
والطرف دايم شقي ذراف = من بعدهم واشقا حالي
ابو سامي
يلطف بكم والي الالطاف = اشكي همومك على الوالي
من يزبنه مايجيه خلاف = والبعد لو طال ماحالي
صلاح
رب الملا ماعنه محراف = ندعيه فاقفاي واقبالي
نبغي سبب يرضي الاطراف = بعد الله يحل الاشكالي
ابو سامي
تري الرضا غاية الانصاف = مكسبك من روس الاموالي
عهدي بكم ترمي الاهداف = وتحل الاشكال طوالي
صلاح
من يمهم جاني الاجحاف = والوضع ياصحاب لازالي
ولازال همي معي ميلاف = ارسلت ماعاد مرسالي
ابو سامي
اصرف نظر ماعليه آساف = وضعه مفارق يورالي
ومرسولكم صاحب استنزاف = مادام ماعاد محتالي
موضوع: صلاح المطرفي + الشاكر ابوسامي 
الإثنين يونيو 30, 2008 4:08 am
